Сувтӧдісны пасъяс

Районын унатор вӧчӧны Победалы 70 во тырӧмкӧд йитӧдын. Победалӧн знамя матӧ во нин кытшовтӧ районса школаяс. Урокъяс вылын челядькӧд сёрнитӧны, кыдзи фронт вылын да тылын дорисны Победа. Сиктъясын пелькӧдӧны да мичмӧдӧны война вылын усьӧмъяслы да сы бӧрын кувсьӧмъяслы пасъяс.

Зільӧ и миян овмӧдчӧмин. Администрациякӧд ӧтвылысь корсис фронтöвикъяслысь гуяс. Отсасис Шӧръягса школаысь чужан му туялысьяслӧн котыр, кодöн юрнуӧдӧ Зоя Степановна Напалкова. Велӧдчысьяс аддзисны сиктса шойна вылысь война вылын вӧвлӧм Григорий Фёдорович Нестеренколысь гу. Донса шойна вылö дзебӧмаӧсь Александр Дмитриевич Жикинӧс, коді война вылысь локтӧм бӧрын уджаліс Донса сиктсӧветлӧн исполкомын, комсомол райкомын, вӧлі зэв пыдди пуктана мортӧн, бура ворсліс баянӧн, отсавліс нуӧдны гажъяс. Администрация чукӧртіс документъяс да шыӧдчис райвоенкоматӧ, медым военно-мемориальной компания пыр вӧчӧдны да налӧн гуяс вылö сувтӧдны мраморысь вӧчӧм пасъяс, и найӧ сувтісны таво арнас. Таын ыджыд пайыс асшӧр уджалысь Николай Иванович Кузнецовлӧн.

Олӧма йӧз, кодъяс тӧдлісны войналысь кӧр, вуджисны став шогсӧ, кӧсйӧны, мед том йӧз пыдди пуктісны да эз вунӧдны война вылö ветлысьясӧс, вылын кутісны налысь ним да видзисны тайӧ йӧзсӧ вежӧраныс.

Раиса ТИМУШЕВА,

олӧмаяслӧн Донса котырӧн юрнуӧдысь.